सडक प्रयोगकर्ता नेपालीको एउटा बानी नै छ, ‘घरबाट विस्तारै निस्किने, सडकमा हतार गर्ने !’ जसका कारण दुर्घटनाको जोखिम बढी हुन्छ ।

सडकमा सबैभन्दा बढी हतार गर्नेमा मोटरसाइकल चालक हुन्छन् । महानगरीय ट्राफिक प्रहरी महाशाखाका अनुसार संघीय राजधानी काठमाडौं उपत्यकामा हुने सवारी दुर्घटनामध्ये अधिकांश मोटरसाइकल चालकको असावधानीका कारण हुने गर्छन् ।

उपत्यकासहित देशभर हुने सवारी दुर्घटनाको ग्राफ हेर्दा पनि मोटरसाइक दुर्घटनाको दर अन्यभन्दा दोब्बर बढी छ ।

मोटरसाइकल दुर्घटनामा हुने मृत्युको प्रमुख कारण के होला ? महानगरीय ट्राफिक प्रहरी महाशाखाका अनुसार ८२.२ प्रतिशत कारण हेल्मेट खस्दा हो ।

हामीले मोटरसाइकल चलाउँदा लगाएको हेल्मेटको फिता नबाँध्ने तथा राम्ररी नबाँध्ने (खुकुल छाड्ने) कारणले गर्दा दुर्घटना भएको अवस्थामा टाउकोमा लगाइको हेल्मेट खस्ने गर्छ । जसका कारण मोटरसाइकल चालकको मृत्यु हुने संभावना बढी रहन्छ ।

जापानी सहयोग नियोग (जाइका)को ट्राफिक स्वयंसेवक टीमले गरेको अध्ययनअनुसार मोटरसाइकल दुर्घटनामा चालकको मृत्यु हुनुको प्रमुख कारण हेल्मेट नलगाउनु तथा राम्ररी नलगाउनु हो ।

अध्ययनअनुसार हेल्मेट खसेको अवस्थामा मोटरसाइकल चालकको मृत्यु हुने सम्भावना ३ गुणा बढी हुन्छ । यस्तै, स्कुटर चालकको मृत्यु हुने दर ४.६ गुणा बढी हुन्छ ।

त्यसैले मोटरसाइकल चालकले सुरक्षित यात्राका लागि आफूले प्रयोग गर्ने हेल्मेटको फिता राम्ररी बाँधेर मात्रै मोटरसाइकल चलाउनु उपयुक्त हुन्छ ।

मोटरसाइकको फिता धेरै खुकुलो राख्नु हुँदैन । फिता बाँधेको अवस्थामा घाँटी माथि (चिउँडोको तलबाट) हातको एउटा औंला छिर्ने जति मात्रै ‘ग्याप’ राख्नुपर्दछ ।