काठमाडौं-नेपाल विद्युत प्राधिकरणले तय गरेको नयाँ पोलभाडा तिर्नुपरे इन्टरनेटको शुल्कमा वृद्धि हुने व्यवसायीहरुले चेतावनी दिएका छन् ।

सेवा–प्रदायकहरुको ढाडै सेक्नेगरी प्राधिकरणले ल्याएको नँया भाडादरले ईन्टरनेटको शुल्क १५ देखि २० प्रतिशतसम्म बढ्नसक्ने उनीहरुले चेतावनी दिएका हुन् ।

नेपाल विद्युत प्राधिकरणले हाल एक पोल वापत प्रति वर्ष १५० रुपैयाँ भाडा लिँदै आएको छ । इन्टरनेट सर्भिस प्रोभाइडर एसोसिएसन अफ नेपाल (आइएसपीएएन्) का अध्यक्ष भोजराज भट्ट भन्छन् ‘यहि आर्थिक वर्षदेखि लागुहुने गरी प्रति किलोमिटर तारको मोटाई अनुसार प्रति महिना २७ सय रुपैयाँसम्म भाडा प्राधिकरणले तय गरेको छ, भोली टेलिकमले पनि त्यही अनुसार भाडा लिएमा मूल्य वृद्धि गर्नुको कुनै विकल्प छैन । ’

अध्यक्ष भट्टले प्राधिकरणले भाँडा वृद्धि गरे अन्ततः त्यसको भार उपोभोक्तालाई पर्ने बताउँछन् । केही समय अघि विद्युत प्राधिकरण, दुरसञ्चार प्राधिकरण र इन्टरनेट सेवा प्रदायकबीचको छलफलमा पोलभाडा व्यवस्थापन गर्न एक समिति गठन गर्ने निर्णय भएको थियो । समितिको निर्णय बिनै प्राधिकरणले पोल भाँडा बढाउने निर्णय गरेपछि इन्टरनेट प्रधायकहरु अक्रोशित बनेका छन् ।