काठमाडौं– चलचित्र समीक्षाको विषयलाई लिएर पक्राउ परेका युट्यूबर प्रनेश गौतम हाजिरी जमानीमा रिहा भएका छन् ।

बिहीबार साँझ रिहा भएका गौतमले शुक्रबार प्रहरीमा तारेख बुझाएका छन् ।

महानगरीय अपराध महाशाखाका प्रमुख प्रहरी वरिष्ठ उपरीक्षक सहकुल थापाले गौतम रिहा भएको जानकारी दिए । एसएसपी थापाले प्रहरीको सम्पर्कमा रहने गरी बिहीबार राति ८ बजे रिहा गरिएको बताए ।

चलचित्र ‘वीरविक्रम–२’को समीक्षाको विषयलाई लिएर प्रहरीले गौतमलाई पक्राउ गरेको थियो । समीक्षामार्फत आफ्नो मानहानी गरेको भन्दै चलचित्रका निर्देशक मिलन चाम्सले गौतमविरुद्ध अपराध महाशाखामा उजुरी दिएका थिए ।

महाशाखाले गौतमलाई पक्राउ गरी विद्युतीय अपराध ऐनअन्तर्गत अनुसन्धान अगाडि बढाएको थियो ।

फिल्म समीक्षा गर्दैमा गौतमलाई पक्राउ गरिएको भन्दै प्रहरीको विरुद्ध प्रदर्शन समेत भएको थियो ।