लमही– नेपाल विद्युत् प्राधिकरणको दाङको लमहीस्थित उपवितरण केन्द्रले मात्रै साढे १ करोड रुपैयाँ विद्युत् महसुल उठाउन बाँकी छ ।

प्राधिकरणको लमही उपवितरण केन्द्रले २२ महिनासम्मको महसुल उठाउन सकेको छैन ।

उपवितरण केन्द्रअन्तर्गतका १ हजार २ सय ४३ ग्राहकबाट जरिवानाबाहेक १ करोड ४० लाख ९५ हजार १ सय ८५ रुपैयाँ उठाउन बाँकी छ ।

उपवितरण केन्द्रअन्तर्गत सबैभन्दा धेरै एसएमबी फुड प्रोडक्टको ६ लाख १९ हजार ५ सय ४ रुपैयाँ बराबर विद्युत महसुल बुझाउन बाँकी छ ।

यस्तै प्राथमिक स्वास्थ्य केन्द्र लमहीको १ लाख ७५ हजार ७ सय २४, मनकामना एग्रिगेट बालुवा उद्योगको १ लाख ४ हजार, चिरण राइस मिल (पाण्डे राइस आयल मिल) को ४ लाख ७८ हजार ७ सय ४६, खानेपानी योजनाको १ लाख ६७ हजार, खड्का सःमिलको १ लाख ६७ हजार १ सय ५०, लमही नगर विकास समितिको ५१ हजार महसुल बाँकी छ ।

बगिया खानेपानी भैसहवाको १ लाख ९७ हजार, छम्पाली आयल मिलको १ लाख ९ हजार, दाङ भ्याली ह्युमपाइप सुन्डबरीको ६४ हजार, नर्ति रेञ्जपोष्टको ५३ हजार, राप्ती उद्यम प्रालिको ३ लाख १५ हजार, भन्सार कार्यालयको ५७ हजार, हमाल राइस तथा आयल मिलको ६३ हजार, शिवशक्ति कृषक सहकारी संस्थाको १ लाख १२ हजार, गोराराम बोहोराले ३ लाख ६४ हजार विद्युत् महसुल बुझाउन बाँकी रहेको उपवितरण केन्द्रले जनाएको छ ।

विद्युत् प्राधिकरण लमही उपवितरण केन्द्रका प्रमुख नन्दलाल शर्माका अनुसार धेरैजसो सरकारी कार्यालय र उद्योगको महसुल बाँकी छ । उनले महसुल नबुझाएका ग्राहकको तत्काल विद्युत लाइन काट्ने तयारी भइरहेको पपिन बताए ।

मिटर जाँच भएको ६० दिनभित्र महसुल नबुझाए लाइन काट्ने प्रावधान रहे पनि उपवितरण केन्द्र लमहीले २२ महीनासम्म पनि महसुल नबुझाएका ग्राहकको विद्युत् लाइन काट्न भने सकेको छैन ।