काठमाडौं- नेपाली कांग्रेसका शीर्ष नेता आन्तरिक छलफलमा जुटेका छन् । कांग्रेसको केन्द्रीय समिति बैठक सभापति शेरबहादुर देउवाले पेलेर जाने नीति लिएको भन्दै बरिष्ठ नेता रामचन्द्र पौडेल र कृष्ण सिटौलाले बैठक बहिष्कार गरेपछि सभापति देउवा सहमति जुटाउने कसरतमा लागेका छन् ।

देउवा छलफलका लागि आज (शनिबार) पौडेल निवास बोहराटार पुगेका छन् । बरिष्ठ नेता पौडेलले सामाजिक सञ्जाल फेसबुकमा आन्तरिक छलफलका लागि सभापति देउवा आफ्नो निवास आएको उल्लेख गरेका छन् ।

फेसबुकमा पौडेलले लेखेका छन्, ‘पार्टी सभापति , पूर्वप्रधानमन्त्री शेर बहादुर देउवा र उप सभापति विमलेन्द्र निधि आज मेरो निवास बोहराटारमा । पार्टी सहमति र सहकार्यमा संचालन गर्नुपर्ने बारे छलफल ।’

यसअघि केन्द्रीय समिति बैठकमा बरिष्ठ नेता पौडेलले सभापतिले पार्टी एकलौटी रुपमा पार्टी चलाउन खोजेको भन्दै त्यसो गरे आफूलाई मान्य नहुने बताएका थिए ।