सप्तरी- आगामी मङ्सिर १४ गते हुने उपनिर्वाचनअन्तर्गत आज स्थानीय तहतर्फ सप्तरीको एकमात्र वडाध्यक्ष पदका लागि उम्मेदवारी मनोनयन सम्पन्न भएको छ ।

छिन्नमस्ता गाउँपालिका वडा नं ७ को वडाध्यक्ष पदका लागि विभिन्न राजनीतिक दल तथा स्वतन्त्र गरी नौ जनाले उम्मेदवारी मनोनयन गरेको मुख्य निर्वाचन अधिकृत चन्द्रमणि ज्ञवालीले जानकारी दिए ।

नेपाल कम्युनिष्ट पार्टी (नेकपा) बाट अच्छेलाल यादव, नेपाली काङ्ग्रेसबाट शिवनारायण मण्डल, राजपा नेपालबाट प्रमिलादेवी यादव, राष्ट्रिय प्रजातन्त्र पार्टीबाट गजेन्द्र मण्डल, नेपाल लोकतान्त्रिक पार्टीबाट सकलदेव साह र जनमत पार्टीबाट दिनेशकुमार यादवले उम्मेदवारी मनोनयन गर्नुभएको छ । नौमध्ये नुर हसन मन्सुरी, रञ्जीतकुमार यादव र धीरेन्द्रकुमार यादवले स्वतन्त्रबाट उम्मेदवारी दिएका हुन् ।

मनोनयन दर्ता गर्न राजपाका उम्मेदवारसँगै आएका समाजवादी पार्टी सप्तरीका अध्यक्ष केदार यादवले राजपाको उम्मेदवारलाई सघाउने जनाए । वडाध्यक्ष पदका लागि नेकपा र राजपाका उम्मेदवारबीच मुख्य प्रतिस्पर्धा हुने मतदाता बताउँछन् ।

यसअघि स्वतन्त्रबाट उम्मेदवार बनेका अच्छेलाललाई आठ मतको झिनो अन्तरले राजपाका प्रभाकर यादवले जितेका थिए । उनी जिल्ला समन्वय समिति सप्तरीको प्रमुखमा निर्वाचित भएपछि रिक्त रहेको सो पदका लागि उपनिर्वाचन हुन लागेको हो ।

उपनिर्वाचनमा अच्छेलाल नेकपाबाट उम्मेदवार बनेका छन् भने राजपाबाट प्रमिलादेवी उम्मेदवार बनेकी छिन् । निर्वाचन आयोगले स्थानीय तहका उम्मेदवारको उम्मेदवारी मनोनयनका लागि आज बिहान १० बजेदेखि दिउँसो एक बजेसम्मको समय तोकेको थियो ।

मङ्सिर १४ गते बिहान ७ बजेदेखि ५ बजेसम्म हुने मतदानका लागि छिन्नमस्ता गाउँपालिका वडा नं ७ मा ७५७ पुरुष र ६४६ महिला गरी एक हजार ४०३ मतदाता रहेको मुख्य निर्वाचन अधिकृत कार्यालय सप्तरीले जानकारी दिएको छ । पहिलो स्थानीय तहको निर्वाचनमा सो वडामा एक हजार १७५ मतदाता रहेकामा अहिले २२८ मतदाता थपिएको हो ।