काठमाडौं– अवैतानिक महाबाणिज्य दूतहरु (एचसीसी) को अन्तर्राष्ट्रिय सम्मेलन बुधबारदेखि काठमाडौंमा शुरु भएको छ ।

सम्मलेनको उपराष्ट्रपति नन्दबहादुर पुनले उद्घाटन गरेका छन् ।

‘नेपालको आर्थिक समृद्धिका लागि ऐक्यबद्धता’ भने नारा साथ सम्मेलन सुरु भएको हो । सम्मेलन कात्तिक २९ गते (पर्सि)सम्म चल्ने एचसीसीले जानकारी दिएको छ ।

सम्मेलनको उदघाटन गर्दै परराष्ट्र मन्त्री प्रदिपकुमार ज्ञवालीले आर्थिक समृद्धिका लागि नेपालले विश्व समुदायसँग हातेमालो गर्ने बताए ।

नेपालले विकास, रोजगार, शिक्षा, जलवायु परिवर्तन, पर्यटन विस्तार, ठूला उद्योगका लागि विदेशीले लगानी गर्ने वातावरण सरकारले बनाएको उनको दाबी थियो ।

‘नेपाल सरकारले राजनीतिक परिवर्तनलाई संस्थागत गरेर आर्थिक र विकासका लागि कदम अगाडि बढाएको छ’, मन्त्री ज्ञवालीले भने,’ विश्व समुदायको सहकार्य विना विकास र आर्थिक उन्नति सम्भव छैन ।’

विश्व अर्थतन्त्रसँग नेपालको पर्यटन, माइग्रेशन, अध्यागमन जस्ता महत्वपूर्ण विषयलाई जोडनुपर्ने एचसीसी नेपाल र साउथ अफ्रिका डिन प्रदिपकुमार श्रेष्ठले बताए ।

आर्थिक गतिविधि, सामाजिक रुपान्तरण, जलवायु परिवर्तनजस्ता विषयमा सरकारले नीजि तथा अन्तराष्ट्रिय समुदायसँग सहकार्य गर्नुपर्ने उनको सुझाव थियो ।

पछिल्लो समय विश्वमा जलवायु परिवर्तन, आंतककारी हमाल, मानव तस्करीजस्ता विषय चुनौतीका रुपमा देखा परिरहेको र यो विषयमा विश्व समुदाय गम्भीर भएर काम गर्नुपर्ने फिखाका प्रमुख आकुता इकानले बताए । आजको युगमा विश्वले आर्थिक, विकास, शान्ति र सुरक्षा खोजी रहेको उनको भनाइ थियो ।

सम्मेलनमा आर्थिक समृद्धि, शिक्षा, रोजगार, पर्यटन, जलवायु परिवर्तन, पर्यटक, लैगिक समनता, आप्रवासन समस्या र आर्थिक पहुँच जस्ता विषयमा छलफल हुने भएको छ । विश्वका ८० भन्दा धेरै देशका १ हजारभन्दा धेरै दूतहरु यो संस्थामा कार्यरत छन् ।