काठमाडौं– दुई दिने नेपालको राजकीय भ्रमणमा रहेका चिनियाँ राष्ट्रपति सी चिनफिङलाई नेपालमा भव्य स्वागत गरिएको छ ।

औपचारिक भेटवार्तासँगै राष्ट्रपति विद्यादेवी भण्डारीले आयोजना गरेको रात्रिभोजमा राष्ट्रपति सीले नेपाली खानाका परिकारको स्वाद चाखेका छन् ।

उनका लागि रात्रिभोजमा एपिटाइजर, सुप, मेन कोर्ष र डिजर्ट गरी चार तहमा खानाको परिकार विभाजन गरिएको थियो । राष्ट्रपति सीले रात्रिभोजमा नेपाली बारा तथा कुरिलो र क्वाँटीको स्वाद लिएका छन् ।

त्यसो त उनका लागि चिनियाँ खाना बनाउने सेफ भने चीनबाटै ल्याइएका थिए । राष्ट्रपति सीलाई दिइने रात्रिभोजमा नेपाली, युरोपेली र चिनियाँ गरी तीन स्वादको मिश्रण रहेको थियो । राष्ट्रपति सीलाई सबैभन्दा पहिला कुरिलो र क्वाँटीको नेपाली सुप सर्भ गरिएको जनाइएको छ । त्यसपछि उनले बारासहितको नेपाली सलादको स्वाद लिएका थिए । नेपाली परिकारहरु नेपाली सेफले नै बनाएका थिए ।

मेन कोर्षमा भने सीकै इच्छा अनुसार चिनियाँ र युरोपेली खाना खुवाइएको थियो । चिनियाँ खाना सी भ्रमण टोलीमा रहेका सेफले नै बनाएका थिए । युरोपेली खाना सोल्टीका सेफले बनाएका थिए ।

रात्रिभोजमा सी भ्रमण दलमा रहेका चिनियाँ उच्च अधिकारी, नेपालबाट राष्ट्रपति भण्डारी, प्रधानमन्त्री केपी शर्मा ओली, पूर्वप्रधानमन्त्रीहरु, राजनीतिक दलका नेताहरु, सुरक्षा निकायका प्रमुखहरु सहभागी भएका थिए ।