काठमाडौं– बैंकका प्रमुख कार्यकारी अधिकृतको उमेर हद तोक्ने राष्ट्र बैंकको निर्णय कार्यान्वयन नगर्न सर्वोच्च अदालतले अन्तरिम आदेश जारी गरेको छ ।

प्रधानन्यायाधीश चालेन्द्रशमशेर राणाको एकल ईजलाशले बैंकक सीईओ उमेरहद तोक्ने राष्ट्र बैंकको परिपत्र तत्काल कार्यान्वयन नगर्न अन्तरिम आदेश जारी गरेको हो ।

६५ वर्षमाथिका व्यक्तिहरु बैंकका सीईओ नियुक्त हुन नपाउने र बहाल रहेको भए ६९ वर्षभन्दा बढी भएको हुन नहुने भन्दै राष्ट्र बैंकले बैंकहरूलाई परिपत्र गरेको थियो ।

राष्ट्र बैंकको परिपत्र कार्यान्वयन नगर्न माग गर्दै प्राइम कमर्सियल बैंकका प्रमुख कार्यकारी अधिकृत नारायणदास मानन्धरले दायर गरेको रिटमा सर्वोच्चले आदेश जारी गरेको हो ।

सर्वोच्चको आदेशमा भनिएको छ,‘राष्ट्र बैंक ऐन २०५८ को दफा ७९ मा वाणिज्य बैंक तथा वित्तीय संस्थाको काम कारबाही नियमन गर्ने, ऐनले निर्दिष्ट गरेका विषयमा आवश्यक निर्देशन दिने तथा विशेष अवस्थामा प्रयोग हुने अधिकारका सम्वन्धमा उल्लेख भएको देखियो, तथापि सो दफामा बैंक तथा वित्तीय संस्थाको प्रमुख कार्यकारीको उमेर हद तोक्न सक्ने अधिकार विपक्षी बैंकलाई प्रदान गरेको देखिएन ।’