एजेन्सी– मेक्सिकोका कुख्यात लागूऔषध कारोबारी योयाकिम एल च्यापो गुजमन अमेरिकामा १० अभियोगमा दोषि ठहर भएका छन् । अमेरिकाको न्यूयोर्क शहरमा रहेको ब्रुकलिन अदालतले मेक्सिकोको सबैभन्दा शक्तिशाली लागूऔषध कार्टेल सिनाओलाका प्रमुख एल च्यापोलाई १० अभियोगमा दोषि ठहर गरेको हो ।

उनी कोकेन, हेरोइनको तस्करी, गैरकानूनी हतियार राखेको, हत्या, सम्पत्ति शुद्धिकरणलगायतका १० अभियोगमा दोषि ठहर भएका हुन् । उनले नेतृत्व गरेको सिनाओला कार्टेल मेक्सिकोबाट अमेरिकामा लागूऔषध तस्करी गर्ने सबैभन्दा शक्तिशाली लागूऔषध कार्टेल मानिन्छ ।

त्यसकारण उनी सन् २००९ मा फोब्र्स पत्रिकामा सबैभन्दा धनी मानिसहरुको सूचिमा ७ सय १ औं स्थानमा पनि अटाएका थिए । तत्काल सजाय नसुनाइएपनि उनलाई आजीवन कारावासको सजाय हुनसक्ने जनाइएको छ ।

उनी सन् २०१४ मा मेक्सिकोमा पक्राउ परेका थिए । त्यसको एक वर्ष नबित्दै उनी मेक्सिकोको सबैभन्दा सुरक्षित मानिने जेलबाट सुरुङ खनेर नाटकीय रुपमा भागेका थिए ।

त्यसपछि उनलाई मेक्सिकोमा सन् २०१६ मा पक्राउ गरिएको थियो भने सन् २०१७ मा उनलाई अमेरिकामा सुपुर्दगी गरिएको थियो ।

उनलाई अमेरिकामा हालसम्म कोही पनि भाग्न नसकेको कोलोराडो राज्यमा रहेको एडिएक्स नामक जेलमा राखिने जनाइएको छ । सन् १९९४ मा स्थापना भएको यो जेल अमेरिकाकै सबैभन्दा सुरक्षित तथा कठोर मानिन्छ ।