लण्डन– बेलायती गृहमन्त्री सजिद जावेदले गोप्य दस्तावेज सार्वजनिक गर्दै आएको वेबसाइट विकिलिक्सका संस्थापक जुलियन असान्जलाई अमेरिका सुपुर्दगी गर्ने आदेशमा हस्ताक्षार गरेको जनाएका छन् ।

बीबीसी रेडियो ४ को कार्यक्रममा कुरा गर्दै उनले बुधबार उक्त आदेशमा हस्ताक्षार गरेको खुलासा गरेका हुन् । धरौटी आदेश अटेर गरेको अभियोगमा दोषी प्रमाणित भई हाल बेलायती जेलमा रहेका उनलाई अमेरिकाविरुद्ध जासुसी गरेको अभियोग लागेको छ । अमेरिकामा उनीविरुद्ध १८ अभियोग दर्ता गरिएको छ ।

६ वर्ष बेलायतको राजधानी लण्डनमा रहेको इक्वेडोरको राजदूतावासमा शरण लिएर बसेका उनलाई गत अप्रिलमा इक्वेडोरले शरण फिर्ता गरेपछि उनी अहिले बेलायतको उच्च सुरक्षा रहेको बेलमार्स जेलमा ५० साता लामो सजाय भोगिरहेका छन् ।