काठमाडौं– काठमाडौं महानगरपालिकाका मेयर विद्यासुन्दर शाक्यले टुँडिखेल कसैले बेच्दा पनि नबेच्ने र कसैले किन्दा पनि नकिन्ने टिप्पणी गरेका छन् ।

महानगरको २५ औं महानगर दिवसको जानकारी गराउन आयोजित पत्रकार सम्मेलनमा शाक्यले अकुपाइ टुँडिखेलको नाममा राजनीति गर्न खोजिएकोसमेत आरोप लगाए ।

उनले टुँडिखेलमा धरहरा, वीर अस्पताल र दरबार हाईस्कुलको निर्माण सामग्री राखेको र त्यो सामान राख्दैमा टुँडिखेल बेच्यो भनेर विरोधमा उत्रनुको कुनै अर्थ नभएको बताए ।

‘टुँडिखेल सार्वजनिक जग्गा हो’ मेयर शाक्यले भने ‘त्यो न कसैले बेच्छ न कसैले किन्छ ।’

जति अभियान सञ्चालन गरेपनि तत्काल टुँडिखेल खाली नहुने बताउँदै उनले भने ‘वीर अस्पताल, दरवार हाइस्कुल र धरोहरा निर्माणधीन रहेकाले संरचनाको निर्माण सम्पन्न नभएसम्म टुँडिखेल खाली हुँदैन ।’

उनकाअनुसार संरचना निर्माण सकिएपछि ती स्थान खाली हुनेछन् ।

अकुँपाइ टुडिखेल अभियान सञ्चालन भइरहँदा धेरैले टुँडिखेललाई महानगरले बेच्यो भन्दै विरोध गरेको बताए । ‘महानगरले टुँडिखेल बेच्यो भनेर विरोध गर्नुपर्दैन’ शाक्यले भने ‘त्यो महानगरले बेच्दा पनि बेच्दैन र किन्न पनि कोही आउँदैन ।’

छातीमा विरोधको नारा भिरेर टुँडिखेल बेच्न पाइँदैन भन्नुको अर्थ नभएको र सार्वजनिक सम्पति कसैले नकिन्ने जानकारीमा राख्न मेयर शाक्यले आग्रह गरे ।