रियाद– दक्षिणी यमनका पृथकतावादीले अन्तर्राष्ट्रिय मान्यताप्राप्त सरकारको राजधानी आदेन शहरको ठूलो हिस्सामा कब्जा जमाएका छन् ।

आइतबार भएको व्यापक भीडन्तपछि दक्षिणी यमनका पृथकतावादी समूह साउदर्न ट्रान्जिसनल काउन्सिल एसटिसीका लडाकुहरुले आदेनको ठूलो हिस्सामा कब्जा जमाएको अन्तर्राष्ट्रिय सञ्चारमाध्यमले जनाएका छन् ।

यसअघि साउदी अरब नेतृत्वको गठबन्धनले पृथकतावादी समूहका लडाकुलाई लक्षित गरी हवाई आक्रमण गरेको थियो । हवाई आक्रमणसँगै साउदी अरबले उक्त समूहलाई आदेनबाट पछि हट्न चेतावनी दिएको थियो । तर, साउदी चेतावनीको बेवास्ता गर्दै एसटिसीका लडाकुले आदेनमा रहेका सरकारी कार्यालयहरु कब्जामा लिएका हुन् ।

एसटिसीले शिया लडाकु समूह हुथी विरुद्धको गठबन्धनप्रति आफ्नो समर्थन रहेको तथा साउदी अरबमा हुन लागेको हुथी विद्रोही विरुद्धको सम्मेलनमा समेत सहभागी हुने जनाएको छ । तर, आदेनबाट फिर्ता नहुने एसटिसीको भनाइ छ । दक्षिणी यमनलाई बेग्लै राज्य स्थापनाका लागि एसटिसी लडिरहेको छ ।

एसटिसीलाई यमनमा जारी युद्धमा साउदी अरबको रणनीतिक साझेदार संयुक्त अरब इमिरेट्स यूएईले एसटिसीलाई पैसा, हतियार तथा तालिम दिएर सहयोग गर्दै आएको छ ।

यता अन्तर्राष्ट्रिय मान्यताप्राप्त सरकारको सबैभन्दा ठूलो साझेदार साउदी अरबले भने अन्तर्राष्ट्रिय मान्यताप्राप्त राष्ट्रपति अब्दरब्बु मन्सुर हादीप्रति आफ्नो समर्थन निरन्तर रहेको जनाएको छ । साउदी युवाराज मोहम्मद बिन सलमानले यमनी राष्ट्रपति अब्दरब्बु मन्सुर हादीसँग भेटवार्ता गरेका छन् ।