काठमाडौं– महानगरीय प्रहरी बृत्त सिंहदरबारको हिरासतबाट भागेका ४ जना थुनुवामध्ये ३ जना पक्राउ परेका छन् ।

चोरी मुद्दाको अनुसन्धानका लागि हिरासतमा रहेका मदन तामाङ, अनिल थापा, सुब्बा लामा र सुकलाल वाइबा शनिबार फरार भएका थिए ।

हिरासतबाट भागेकामध्ये अनिल थापा र सुब्बा लामा भने प्रहरी बृत्त सिंहदरबारबाट भाग्नेवित्तिकै कालिकास्थानबाट पक्राउ परेका थिए । अर्का फरार थुनुवा सुकलाल वाइबा भने सोमबार बिहान पक्राउ परेका हुन् ।

वाइबालाई सोमबार बिहान जोरपाटीबाट पक्राउ गरिएको महानगरीय प्रहरी परिसर काठमाडौंले जनाएको छ ।

शनिबार हिरासतबाट भागेका ४ जनामध्ये मदन तामाङ भने अझै फेला पर्न सकेका छैनन् ।

मोटरसाइकल चोरी गरी नक्कली पाटपूर्जा बिक्री गर्ने गरेको अभियोगमा पक्राउ परेका उनीहरु अनुसन्धानका लागि प्रहरी हिरासतमा थिए ।

उनीहरुले हिरासत कक्षको झ्यालको ग्रील काटेर भाग्न सफल भएका थिए । प्रहरीका अनुसार ४ जनालाई भाग्नका लागि ग्रील काट्न करण मोक्तानले ह्याक्सो ब्लेड दिएका थिए ।

उक्त ब्लेड उपलब्ध गराउने मोक्तान पनि अहिले प्रहरी नियन्त्रणमा छन् ।

३ प्रहरी निलम्बित

हिरासतबाट ४ जना थुनुवा फरार भएपछि महानगरीय प्रहरी बृत्त सिंहदरबारका ३ जना प्रहरी कर्मचारी निलम्बित भएका छन् ।

उनीहरु भाग्ने बेलाका ड्युटी इञ्चार्ज प्रहरी सहायक निरीक्षक (असई) भीमबहादुर थापा, ड्युटीमा रहेका हवल्दार बोधबहादुर माझी र चन्द्रबहादुर विकलाई निलम्बन गरिएको जनाइएको छ ।