मुम्बई – बलिउडको छोटो पर्दाकी चर्चित कलाकार श्वेता तिवारीले आफ्ना पति अभिनव कोहलीमाथि घरेलु हिंसाको आरोप लगाएकी छिन् ।

उजुरी परेपछि प्रहरीले अभिनवलाई पक्राउ गरेको छ । श्वेताको उजुरीअनुसार पतिले छोरीलाई पनि कुटपिट गर्ने गरेका थिए ।

श्वेताका साथ उनी छोरी पलक पनि प्रहरी स्टेशनको बाहिर थिइन् । भारतीय मिडियाका अनुसार पतिले श्वेता र उनकी छोरीमाथि सधै नराम्रो व्यवहार गर्थे । जसकारण उनलाई प्रहरीको सहारा लिनुपर्ने अवस्था आयो ।

भारतीय मिडियाले स्रोतको हवाला दिँदै लेखेका छन् कि, अभिनवले पलकमाथि अभद्र कमेन्ट गर्ने गर्थे । श्वेताका अनुसार अभिनवले छाेरीलाई सन् २०१७ मा एक मोडलको अश्लील फोटो पनि देखाएका थिए ।

यो उजुरी मुम्बईको समता नगर प्रहरी स्टेशनमा दर्ता भएको छ । श्वेता यसअघि पनि घरेलु हिंसाका विषय उठाएकी हुन् । यसअघि श्वेताका पूर्वपति राजा चौधरीसँग पनि उनको सम्बन्ध खासै राम्रो हुन सकेको थिएन । राजाले पनि नशामा आएर उनलाई कुटपिट गरेका थिए ।

त्यसपछि श्वेताले राजासँग डिभोर्स गरेकी थिइन् ।