काठमाडौं– अखिल नेपाल फुटबल संघ (एन्फा) ले डा टी आओ फुटबल च्याम्पियसिप खेल्ने यु—२१ टोलीको घोषणा गरेको छ । फेब्रुअरी १९ देखि २८ सम्म भारतको गुवाहाटीमा हुने प्रतियोगिताका लागि एन्फाले मंगलबार २० सदस्यीय टोलीको घोषणा गरेको हो ।

टोलीमा गोलरक्षकतर्फ सोजित गुरुङ, विश्णु कुमार केसी र सूर्य अधिकारी रहेका छन् । त्यस्तै, डिफेन्डरतर्फ राजन गुरुङ, असिम भुषाल, विश्वास उदास, गौतम श्रेष्ठ, रणदिप पौडेल, छिरिङ गुरुङ हुँदा मिडफिल्डरमा अनिल महर्जन, आरिक बिष्ट, मनिस थापा, मिकचेन तामाङ, नितिन थापा, अभिषेक रिजाल र सिशिर लेखी रहेका छन् । फरवार्डमा रेजिन सुब्बा, राजिब लोप्चन, धिरज श्रेष्ठ र प्रेजेन तामाङ छन् ।

एन्फाको खेलाडी छनोट समितीले वैकल्पिक खेलाडीका रुपमा गोलकिपरमा अभिषेक बराल र डिफेन्डरमा शनिस श्रेष्ठ रहेका छन् भने मिडफिल्डरमा अरुज सिंह र फरवार्डमा रितीक खड्कालाई राखेको छ ।

टोलीको मुख्य प्रशिक्षकको जिम्मेवारी चेत नारायण श्रेष्ठलाई दिएको छ भने सहायक प्रशिक्षकमा सल्यान खड्गीलाई नियुक्त गरिएको छ । गोलरक्षक प्रशिक्षकका रुपमा चन्नुराम चौधरीको नाम रहेको छ ।

भारतीय राष्ट्रिय फुटबल टोलीका पहिलो कप्तान डा. तालीमेरेन आओको सम्झनामा उक्त प्रतियोगिता आयोजना हुँदै आएको छ ।