काठमाडौं– स्रोत नखुलेको शंकास्पद ५७ लाख ७९ हजार ४ सय ९० रुपैयाँसहित एक जना भारतीय नागरिकलाई प्रहरीले पक्राउ गरेको छ ।

जिल्ला प्रहरी कार्यालय बारा र प्रहरी चौकी वडकी फूलवरिया बाराबाट खटिएको संयुक्त टोलीले बाराको सुवर्ण गाउँपाकिकास्थित दशजगा क्षेत्रबाट उक्त परिमाणको नगदसहित भारतीय नागरिक वृजकिशोर कुमारलाई पक्राउ गरेको हो ।

जिल्ला प्रहरी कार्यालय बाराका एसपी सानुराम भट्टराईले बिहार मोतीहारी जिल्ला बस्ने उनीमाथि चेकजाँच गर्दा सो रकम फेला परेको जानकारी दिए ।

बीआर एसी ४४८६ नम्बरको मोटरसाइकलमा सवार उनले दुबै खुट्टाको घुँडा मुनि पिडौंलाको भाग, कम्मर र जिन्स पाइन्टको खल्ती तथा  हेल्मेट रबाइकको  डिक्की समेतमा लुकाएको अवस्थामा रकम फेला परेको प्रहरीले जानकारी दिएको छ ।

उनीमाथि आवश्यक छानबिन एवं कारवाहीको लागी सम्पति शुद्धिकरण अनुसन्धान विभागमा पठाइएको प्रहरीले जानकारी दिएको छ ।