काठमाडौं– प्रतिनिधिसभाका सांसदहरुले महाराजगञ्जको त्रिवि शिक्षण अस्पतालले (टिचिङ)  निजी अस्पतालको एजेन्टको रुपमा काम गरिरहेको आरोप लगाएका छन् ।

बुधबार बसेको प्रतिनिधि सभा बैठकको शून्य समयमा बोल्दै सत्तारुढ नेकपाका सांसद देव प्रसाद गुरुङले टिचिङ अस्पतालले निजी अस्पतालमा बिरामी रेफर गरेर एजेन्सीको रुपमा काम गरीरहेको आरोप लगाए ।

उनले टिचिङ अस्पतालको आकस्मिक सेवा विभागमा जाने बिरामीलाई अस्पतालले निजी अस्पतालमा रेफर गर्ने गरेको भन्दै त्यसलाई तत्काल रोक्न सरकारसँग आग्रह समेत गरेका छन् ।

‘टिचिङ अस्पतालको इमर्जेन्सिमा जति पनि बिरामी गइरहेका हुन्छन् । ती धेरै जस्तो बिरामीलाई त्यहाबाट प्राइभेट हस्पिटल पठाउने गरीरहेको छ” गुरुङले भने,’राज्यको स्वामित्व रहेको हस्पिटलमा उपचार गराउनुको सट्टामा निजी हस्पिटलमा पठाउने व्यवहार देखिरहेको छ, त्यसले निजी अस्पतालहरुको एजेन्सीको भूमिकाको रुपमा त्यहाको हस्पिटलले काम गरीरहेको जस्तो देखिन्छ त्यसैले त्यसलाई अविलम्ब नियन्त्रण गरियोस् ।’