काठमाडौं– नेकपाका अध्यक्ष पुष्पकमल दाहाल ‘प्रचण्ड’ले इन्चार्ज र सहइन्चार्ज लगायत पार्टीका विभागहरुको गठन प्याकेजमा नै गरिने बताएका छन् ।

प्रधानमन्त्री तथा पार्टी अध्यक्ष केपी ओली विदेश भ्रमणबाट फर्किए लगत्तै पार्टी एकताका काम टुंगिने प्रचण्डको भनाइ थियो । चितवनमा पत्रकारहरुसँग कुरा गर्दै प्रचण्डले छलफल र तयारी नपुगेका कारण इन्चार्ज र सहइन्चार्ज तोक्न ढिलाइ भएको बताए ।

‘केही जिल्लामा हाम्रो छलफल पुगेन । इन्चार्ज सहइन्चार्ज तोक्न नसकेको होइन’ प्रचण्डले भने,‘हामी प्याकेजमा सहमति गर्छौं । विभिन्न आयोगहरु प्याकेजमा नै गर्ने हो प्रधानमन्त्री आएपछि समस्या समाधान हुन्छ । ’

उनले इन्जार्च र सहइन्चार्जमा दोहोरो पद हुँदै हुन्न र हुनैपर्छ भन्ने भन्ने निरपेक्ष कुरा गर्न नहुने बताए ।

विधयेकहरुमा विरोध भइरहेको छ, सरकारले ल्याउन नजानेको कि यत्तिकै विरोध भइरहेको भन्ने पत्रकारको प्रश्नमा प्रचण्डले विधेयक बनाउँदा तयारी नपुगेको स्वीकार गरे ।

‘विधेकयमा तयारी राम्ररी नपुगेको हो । पक्कै पनि पार्टी र सरकार सतर्क भएको छ । आगामी दिनमा छलफल गरेर अघि बढाउनुपर्छ’  उनले भने ।  प्रचण्डले गुठी र मिडियासम्बन्धीसहित अन्य विधेयकमा आवश्यक परिमार्जन गरेर अघि बढ्ने बताए ।

त्यसतै लोकसेवा आयोगलाई राज्य व्यवस्था तथा सुशासन समितिले पदपूर्ति आह्वान बन्द गर्न दिएको निर्देशन बारे प्रधानमन्त्री स्वदेश फर्किएपछि छलफल हुने प्रचण्डले बताए ।

समितिले र आयोगले आफ्नो आफ्नो काम गरेको भन्दै प्रचण्डले यस विषयमा छलफल गरेर निष्कर्षमा पुग्नु पर्ने बताए । ‘प्रधानमन्त्री जी आएपछि सकारात्मक रुपमा अघि बढाउनुपर्छ’ प्रचण्डले भने,‘समितिले आफ्नो काम गरेको छ, सरकारले आफ्नो काम गरेको छ अब छलफल गरेर अघि बढ्नुपर्छ ।’

प्रचण्डले चितवनमा बन्न लागेको रंगशाला निर्माणका क्रममा भएका समस्या सामान्य भएको प्रतिक्रिया दिएका छन् । रंगशाला निर्माण राष्ट्रिय गौरवको जस्तै आयोजना भएको भन्दै प्रचण्डले ठूला काम गर्दा कहिलेकाही सानो समस्या देखा पर्ने बताए ।

‘यो राष्ट्रिय गौरवको आयोजना हो । चितवनका लागि समृद्धिको यात्राको लागि यसले सहयोग गर्छ । हामी सबैले यसमा योगदान गर्नुपर्छ’ प्रचण्डले भने,‘ यसो गर्दा पनि रकम पुगेन भने यसलाई सरकारले सहयोग गर्छ । चन्दाको भरमा मात्र यत्रो ठूलो आयोजना सम्पन्न हुन गारो पर्छ ।