काठमाडौं– कैलालीको तत्काली उर्मा गाविसस्थित बेहडाबाबा उच्च माविका प्राध्यानाध्यापक (हेडमास्टर)ले बिदामा बसेका शिक्षकका नाममा लाखौं रुपैयाँ बराबरको तलव माग गरी अपचलन गरेको फेला परेको छ ।

अख्तियार दुरुपयोग अनुसन्धान आयोगको छानबिनबाट बेहडाबाबा उमाविका तत्कालीन प्रधानाध्यापक गोविन्दराज ओझा समेतको मिलेमतोमा लाखौं रुपैयाँ हिनामिना भएको देखिएको हो ।

तत्कालीन प्रअ ओझाले १४ जेठ २०७४ देखि गैर हाजिरी (बिदामा) रहेका शिक्षकको नाममा माग फारम भरी २०७३ वैशाख मसान्तसम्मको तलवभत्ता भुक्तानी लिएर अनियमितता गरेका हुन् ।

तत्कालीन प्रअ ओझा, विद्यालय व्यवस्थापन समितिका तत्कालीन अध्यक्ष दरवारी राना र लेखापाल गोपाल सेटीको मिलेमतोमा ११ लाख ४२ हजार २ सय ७२ रुपैयाँ ९७ पैसा अनियमितता गरेको अख्तियारको छानबिनबाट फेला परेको छ ।

उनीहरुले बिदामा रहेका शिक्षकको नाममा तलब लिनुका साथै विद्यालयका सामान खरिद तथा विभिन्न शीर्षकको खर्चमा नक्कली बिल भर्पाए देखाएर अनियमितता गरेको समेत अख्तियारको छानबिनबाट देखिएको छ ।

अख्तियारले तीनैजनाविरुद्ध जनही ११ लाख ४२ हजार २ सय ७२ रुपैयाँ ९७ रुपैयाँ बिगो तथा जरिवाना र कैद सजाय माग गर्दै आइतवार काठमाडौंस्थित विशेष अदालतमा मुद्दा दायर गरेको छ ।