बलोचिस्तान– पाकिस्तानको बलोचिस्तान प्रान्तको गदर शहरस्थित एक पाँचतारे होटल पर्ल कन्टिनेन्टमा बन्दुकधारीले गरेको आक्रमणबाट १ जनाको मृत्यु भएको पुष्टि भएको छ ।

बीबीसीका अनुसार बन्दुकधारीले गरेको आक्रमणबाट पाँचतारे पर्ल कन्टिनेन्टल होटलमा कार्यरत एकजना सुरक्षा गार्डको मृत्यु भएको हो ।

३ जना बन्दुकधारीले शनिबार साँझ हाटेलमा अन्धाधुन्ध गोली प्रहार गरेका थिए ।

इस्लाम धर्मावलम्बीको पवित्र महिना रमजानको छुट्टिका कारण होटलमा कुनैपनि पाहुना थिएनन् । साथै होटलमा कार्यरत कर्मचारीमध्ये अधिकांश छुट्टिमा थिए ।

आक्रमणको जिम्मा पाकिस्तानको अलगाववादी (पृथकतावादी) संठगन बलोचिस्तान लिब्रेशन आर्मी (बीएलए)ले लिएको छ ।

बीएलएले चीनसहित विदेशी लगानीकर्ताका प्रतिनिधिलाई लक्षित गरी आक्रमण गरिएको बताएको छ ।

बलोचिस्तानमा स्थानीय पृथकतावादी समूहहरु चिनियाँ लगानीको विरोध गर्ने गर्छन् ।