काठमाडौं– प्रधानमन्त्री केपी शर्मा ओलीले आतंककारी शैलीमा बम पड्काएर व्यवसायीलाई त्रसित पार्ने विरुद्ध सरकारले एक्सन लिने बताएका छन् ।

मंगलबार प्रधानमन्त्री ओलीलाई भेट्न बालुवाटार पुगेका वैदेशिक रोजगार व्यवसायीलाई ढुक्क भएर व्यवसाय सञ्चालन गर्न प्रधानमन्त्रीले आग्रह गरे ।

व्यवसायीहरुसँगको भेटमा प्रधानमन्त्री ओलीले केटा केटीले लुकामारी खेले जस्तो गरि व्यवसायीलाई धम्काउन, तर्साउने र बम पडकाएर त्रसित बनाउने छुट कसैलाई नभएको र त्यस्तो क्रियाकलाप गर्नेहरुलाई कारवाही गर्ने बताएको छलफलमा सहभागी वैदेशिक रोजगार व्यवसायी संघका पूर्व अध्यक्ष विमल ढकालले बताए ।

ढकालले भने, ‘व्यवसायीमाथि भएको आक्रमण प्रति सरकार गम्भीर छ । ढुक्क भएर व्यवसाय चलाउनुस् भनेर प्रधानमन्त्रीले भन्नु भएको छ ।’
राजनीतिक पार्टीका नाममा विध्वंस मच्चाउनेलाई सरकारले खोजी गरिरहेको प्रधानमन्त्रीले बताएका थिए ।

विप्लव नेतृत्वको नेपाल कम्युनिष्ट पार्टी (नेकपा) को युवा संगठनले गत शुक्रवार राति वैदेशिक रोजगार व्यवसायी संघका अध्यक्ष रोहन गुरुङको घरमा बम विस्फोट गराएर क्षति पुर्‍याएपछि वैदेशिक रोजगार व्यवसायीहरु त्रसित बनेका छन् । उनीहरु व्यवसायको सुरक्षाको माग गर्दैं प्रधानमन्त्री निवास पुगेका हुन् ।