काठमाडौं- एटलान्टा च्याम्पियन्स लिगको प्रिक्वाटरफाइनलमा पुगेको छ । समूह चरणको पहिलो तीन खेलमा पराजित भएको एटलान्टा आश्चर्यजनिक रुपमा प्रिक्वार्टर फाइनलमा पुगेको हो ।

पहिलो पटक च्याम्पियन्स लिगमा स्थान बनाउन सफल एटलान्टाले डाइनामो जाग्रेबसँग ४-०, शाक्टर डोनेस्ट्कसँग २-१ र म्यान्चेष्टर सिटीसँग ५-१ को फराकिलो हार ब्यहोरेको थियो ।

त्यसपछि उसले आफ्नो होममा म्यान्चेष्टर सिटीलाई बराबरीमा रोक्न सफल भयो भने डाइनामो जाग्रेबलाई २-० ले हरायो । अन्तिम खेलमा शाक्टर डोनेस्ट्कलाई ३-० ले हराउँदै एटलान्टा नकआउट चरणमा स्थान बनाउन सफल भयो ।

शाक्टरको मैदानमा भएको खेलमा एटलान्टालाई जित दिलाउनका लागि टिमोटी कास्टाग्ने, मारियो पासालिच र रोविन गोसेन्सले दोस्रो हाफमा गोल गरेका थिए ।

६६औं मिनेटमा कास्टाग्नेको गोलबाट एटलान्टाले अग्रता लियो । ७७औं मिनेटमा शाक्टरका डोडो रातो कार्ड पाउँदै मैदानबाट बाहिरिएपछि कमजोर बनेको युक्रेनी क्लबले दुई गोल खायो । ८०औं मिनेटमा पासालिच र इन्ज्युरी समयमा गोसेन्सले गोल गर्दै एटलान्टालाई ऐतिहासिक जित दिलाए ।

यो समूहबाट म्यान्चेष्टर सिटी विजेता बन्दै नकआउट चरणमा पुगेको छ । अन्तिम खेलमा सिटीले क्रोएसियाको डाइनामो जाग्रेबलाई ४–१ ले हरायो । सिटीको जितमा ग्याब्रियल जेससले ह्याट्रिक गरे ।

१०औं मिनेटमा डानियल ओल्मोको गोलबाटा अग्रता पाएको डाइनामो विरुद्ध जेससले ३४, ५० र ५४ औं मिनेटमा ह्याट्रिक पूरा गरे । ८४औं मिनेटमा फिलिप फोडेनले गोल गर्दै सिटीलाई सहज रुपमा नकआउट चरणमा पुर्‍याए ।