काठमाडौं– १३ औं दक्षिण एसियाली खेलकुद (साग) खेल्ने नेपाली यू–२३ राष्ट्रिय फुटबल टोलीको घोषणा भएको छ ।

प्रतियोगिता शुरु हुन २० दिन मात्रै बाँकी रहँदा मुख्य प्रशिक्षक बालगोपाल महर्जनले ३ सिनियर खेलाडीसहित यू–२३ राष्ट्रिय फुटबल टोलीको घोषणा गरेका हुन् ।

मुख्य प्रशिक्षक महर्जनले सिनियर खेलाडी विकेश कुथु, विक्रम लामा र सुजल श्रेष्ठलाई टोलीमा स्थान दिएका छन् ।

सोमबार घोषित टोलीमा गोलकिपरमा विकेशसँगै अर्पण कार्की र दिप कार्की छन् भने डिफेन्डरमा अनन्त तामाङ, दिनेश राजबंशी, सुमन अर्याल, विक्रम लामा, विकास खवास, मिक्चेन तामाङ र क्रिछिङ गुरुङ छन् ।

यता मिडफिल्डमा सुजल श्रेष्ठसँगै सुनिल बल, हेमन्त थापामगर, नितिन थापा, सेसेहाङ आङदाम्बे र तेज तामाङ रहँदा फर्वाडमा विमल घर्ती मगर, अभिषेक रिजाल, रेजिब सुब्बा र अन्जन बिष्ट छन् । यो टोलीका अधिकाशं खेलाडी सम्मिलित टोलीले १२ औं संस्करणको सागमा स्वर्ण जितेका थिए ।