एल बि मगर

रोल्पा– रोल्पामा लामो समयदेखि स्थानीय बजारहरु अनुगमन नहुँदा उपभोक्ताहरु मारमा परेका छन् ।

स्थानीय प्रशासनले बजार अनुगमन नगर्दा व्यावसायीहरुले दैनिक उपभोग्यका सामाग्रीहरुमा कृतिम अभाव सृजना गरि चर्को मूल्यमा बिक्रीवितरण गरिरहेका छन् । जसका कारण उपभोक्ता ठगिएका छन् ।

प्रशासनले वेवास्ता गर्दा व्यापारीको मोनोपोली बढेको र उपभोक्ता मारमा परेको उपभोक्तावादीहरुको भनाइ छ ।

बजारमा पसल पिच्छे एउटै सामाग्रीको मूल्य फरक फरक भएको , खरिद मुल्यमा ५० प्रतिशतसम्म रकम थप गरेर उपभोक्तासँग लिने गरेको पाइएको छ । तर त्यसको अनुगमन सरकारी तवरबाट हुन सकेको छैन ।

उपभोग मितिको म्याद नाघेका उपभोग्य सामग्रीहरु उपभोक्ताहरुलाई बिक्रीवितरण गर्ने गरिएको भएपनि व्यापारीमाथि कुनै कारवाही हुने गरेको छैन ।

स्थानीय सरकार गठन भएसँगै उक्त अधिकार स्थानीय सरकारमा पनि रहेको छ । तर स्थानीय सरकारले यसबारेमा चासो नलिँदा उपभोक्ता मारमा परेका छन् ।