काठमाडौं– पूर्वराजदुत केशव झाको हत्या आरोपमा पक्राउ परेका सुरक्षागार्ड सानुकान्छा तामाङलाई जिल्ला अदालत काठमाडौंले पुर्पक्षका लागि थुनामा पठाउन आदेश दिएको छ ।

पूर्वराजदूत हत्या प्रकरणमा दोस्रो पटक पक्राउ परेका तामाङलाई बुधबार जिल्ला अदालत काठमाडौं पुर्पक्षका लागि थुनामा पठाएको हो । जिल्ला अदालत काठमाडौंमा उनीविरुद्ध कर्तव्य ज्यान मुद्दा दायर गरिएको थियो ।

झाको बबरमहलस्थित आफ्नै निवासको एकान्त कोठामा रहस्यमय तरिकाले हत्या गरेको आशंकामा प्रहरीले तामाङलाई पक्राउ गरेको थियो । झाकी पत्नी ज्ञानुले तामाङविरुद्ध किटानी जाहेरी दिएपछि प्रहरीले उनलाई यही भदौ १ गते पक्राउ गरेको थियो ।

गत वर्ष भदौ ३ गते राति बबरमहलस्थित आफ्नै निवासमा चक्कु प्रहारबाट ८० वर्षीय बयोवृद्ध झाको हत्या भएको थियो । झामाथि १३ इन्च लामो घरेलु चक्कुले टाउकोमा ४ र घाँटी छेउमा २ पटक प्रहार गरेर हत्या गरिएको विवरण प्रहरी मुचुल्कामा उल्लेख छ ।

मध्यराति घरभित्र सुतिरहेको अवस्थामा झाको हत्या भएपछि लगत्तै अनुसन्धानमा खटिएको महानगरीय प्रहरी अपराध महाशाखाको टोलीले झाकै घरमा पाले तथा भान्छे बसेका तामाङसँगै माली आइतसिंह तामाङ र भान्छे जयबहादुर तामाङलाई पक्राउ गरेको थियो ।

झा हत्या आरोपमा पक्राउ परेका उनीहरु भदौ २९ गते ८–८ हजार रुपैयाँ धरौटीमा छुटेका थिए । महाशाखाले तीनैजनाको पोलिग्राफ परीक्षण गरेको थियो जसमा आइतसिंह र जयबहादुरले झुटो नबोलको पत्ता लागेको थियो भने सानुकान्छाले झुटो बोलेको त्यसबेलै पत्ता लागको थियो ।

पोलिग्राफपछि प्रहरीले सानुकान्छाको नार्को परीक्षण (औषधी खुवाएर अर्धचेत बनाई मनोविज्ञले प्रश्न सोध्ने विधी) समेत गरेको थियो । त्यसमा समेत कुनै ‘क्लु’ फेला परेको थिएन ।

फिंगर प्रिन्टमा समेत केही नदेखिएपछि अन्तत सानुकान्छा प्रहरीबाट छुटेका थिए । यद्यपि, प्रहरीले सानुकान्छाको पोलिग्राफ परीक्षणमा शंका गर्नुपर्ने आधारहरु भेटिएको दाबी गरेको छ ।