काठमाडौं – यस वर्षको प्रतीक्षित फिल्म ‘छ माया छपक्कै’ ले प्रदर्शन मिति तय गरेको छ । यसअघि फिल्म दशैँको मौका पारेर रिलिज हुने भनिए पनि मिति तय गरिएको थिएन ।

निर्माण टिमका अनुसार यो फिल्म असोज १० गते प्रदर्शन हुने भएको छ । चलचित्रमा दीपकराज गिरी र केकी अधिकारीको जोडी देख्न सकिनेछ । फिल्मको छायांकन नसकिँदै विदेशी राइट्स एक करोडभन्दा बढीमा विक्री भएको यो फिल्मको निर्देशन दीपेन्द्र लामाले गर्नेछन् । फिल्ममा केदार घिमिरे, जितु नेपाल लगायतका कलाकारको पनि अभिनय रहनेछ ।

चर्चाका हिसाबले यो फिल्मले दर्शकको ध्यान तान्ने देखिए पनि यो मितिमा अर्को फिल्म ‘घामड शेरे’ पनि पद्रर्शनमा आउने सम्भावना छ । यो फिल्मलाई डीसीएनले वितरणको जिम्मा लिइसकेको छ ।

योसँगै दशैँमा अशोक शर्मा निर्देशित फिल्म ‘रातो टीका निधारमा’ पनि प्रदर्शन हुँदैछ । फिल्म फूलपातीका दिनदेखि रिलिज हुने सम्भावना बढेको छ । यद्यपि ‘घामड शेरे’ र ‘रातो टीका निधारमा’ टिमले रिलिज मिति भने फाइनल गरेका छैनन् ।