काठमाडौं– हिरो गोल्डकप फुटबलमा नेपाली राष्ट्रिय महिला फुटबल टोलीले भारतीय महिला टोलीमाथि ऐतिहासिक जित हात पारेको छ । सोमबार भारतको कालिङ्गा रंगशालामा भएको खेलमा नेपालले भारतलाई २–१ गोल अन्तरले पराजित गरेको हो ।

नेपालका लागि फरवार्ड सावित्रा भण्डारीले गोल गरिन् । उनले खेलको ५ औं मिनेटमा पहिलोे गोल गर्दै भारतविरुद्ध टिमलाई १—० को अग्रता दिलाएकी थिइन् ।

त्यसको २ मिनेटभित्रै अर्थात् खेलको ७ औं मिनेटमा ब्यक्तिगत दोस्रो गोल गर्दै सावित्राले टिमलाई दोहोरो अग्रता दिलाइन् ।
पहिलो हाफमै नेपालसँग २—० गोलले पछि रहेको भारतले खेलको ८४ औ मिनेटमा गोल एक गोल फर्काएको थियो । भारतका लागि रतन बालादेवीले गोल गरेकी थिईन् ।

भारतमाथि जित निकालेको नेपाल ३ अंकसहित दोस्रो स्थानमा उक्लिएको छ । शीर्ष स्थानको म्यानमारले लगातार दुई खेलमा जित निकाल्दै ६ अंक बनाएको छ । लिगको अन्तिम खेल नेपालले इरानसँग खेल्नेछ ।

जितपछि नेपाली महिला टोलीका मुख्य प्रशिक्षक हरि खड्काले भारतलाई उसैको मैदानमा पराजित गर्ने सपना पुरा भएको सामाजिक सञ्जाल फेसबुकमार्फत् बताएका छन् ।