एजेन्सी – भारतीय काँग्रेस पार्टीकी नवनियुक्त महासचिव प्रियंका गान्धी आफ्ना दाजु राहुल गान्धीका साथ सोमबार उत्तर प्रदेशको राजधानी लखनउमा विशाल र्‍यालीमा सहभागी भएकी छिन् ।

पूर्वी उत्तर प्रदेशको जिम्मेवारीसहित अघिल्लो महिना पार्टीले प्रियंका गान्धीलाई महासचिव बनाएपछिको उनको यो पहिलो राजनीतिक र्‍याली हो । यो र्‍यालीलाई मूलधारको राजनीतिमा उनको डेब्युका रुपमा लिइएको छ ।

१५ किलोमिटर लामो र्‍यालीमा काँग्रेस समर्थक लाखौँ मानिसहरु सहभागि रहेको छन् । र्‍यालीमा सहभागीहरुले उनको नामको नारा लगाएका थिए ।

आगामी मे महिनाभित्र हुने आम निर्वाचनको तयारीका लागि र्‍यालीको आयोजना गरिएको हो । मूलधारको राजनीतिमा प्रियंका गान्धीको आगमनले उत्तर प्रदेशमा काँग्रेस समर्थक माझ उत्साह ह्वात्तै बढेको बताइन्छ ।

उनी तीन दिनसम्म उत्तर प्रदेशमै रहने बताइएको छ । सत्तारुढ भारतीय जनता पार्टी बीजेपीको गढ मानिने उत्तर प्रदेशमा प्रियंका गान्धीलाई चुनावमा काँग्रेसलाई जिताउन उति सजिलो नभएको विश्लेषकहरु बताउँछन् ।

बिजेपीले अघिल्लो आम निर्वाचनमा राज्यको ८० मध्ये ७३ सिट जितेको थियो भने काँग्रेस केबल २ सिटमा सिमित बनेको थियो ।