काठमाडौं– सौता लाग्न गएको अभियोगमा बहुविवाह मुद्दाअन्तर्गत कैद र जरिवानाको सजाय पाएकी रिता भनिने हिरा चौलागाईं १० वर्षपछि पक्राउ परेकी छन् ।

तत्कालीन पुनरावेदन अदालत हेटौंडाले २९ वैशाख २०६६ रिताविरुद्ध २ वर्ष कैद र १५ हजार रुपैयाँ जरिवाना सुनाएको थियो । अदालतको फैसलापछि कैद भुक्तान नगरी फरार रहेकी रितालाई काठमाडौंको कपनबाट पक्राउ गरिएको प्रहरीको केन्द्रीय अनुसन्धान ब्यूरो (सिआईबी)ले जनाएको छ ।

मकवानपुरको तत्कालीन हटिया गाविस–९ घर भएकी रिताले २०५५ सालमा ठाकुर प्रसाद चौलागाईंसँग विवाह गरेकी थिइन् ।

घरमा (आफू) श्रीमती हुँदा–हुँदै श्रीमान्ले दोस्रो विवाह गरेको भन्दै ठाकुरकी श्रीमती गिता चौलागाईंले अदालतमा मुद्दा दायर गरेकी थिइन् ।

सोही मुद्दामा अदालतले रिता र ठाकुरविरुद्ध कैद तथा जरिवानाको सजाय सुनाएको थियो । अदालतले सजाय सुनाएको १० वर्षपछि पक्राउ परेकी रितालाई काठमाडौं जिल्ला अदालतमा पेश गरिएको आदेशअनुसार कैद भुक्तानका लागि कारागार कार्यालय जगन्नाथदेवल काठमाडौंमा पठाइएको सिआईबीले जनाएको छ ।