काठमाडौं– उर्जा, जलस्रोत तथा सिंचाईमन्त्री वर्षमान पुन र संयुक्त राष्ट्रसंघका उपमहासचिव लिउ झेनमिनबीच भेटवार्ता भएको छ ।

संयुक्त राष्ट्रसंघको मुख्यालय न्युयोर्कमा भएको भेटवार्तामा उर्जा क्षेत्रमा राष्ट्रसंघ र नेपाल सरकारबीच हुन सक्ने सहकार्य र दिगो विकासको बारेमा छलफल भएको जनाइएको छ ।

उपमहासचिव झेनमिनसँगको भेटवार्तामा मन्त्री पुनले नेपालले उर्जाको पहुँचलाई प्राथमिकतामा राखरे काम गरिरहेको बताए । नेपाल सरकारले १० वर्षमा १५ हजार मेगावाट विजुली उत्पादज गर्ने लक्ष्य राखेको उल्लेख गर्दै मन्त्री पुनले त्यसका लागि काम भइरहेको पनि बताए ।

अमेरिकाको न्यूयोर्कमा शुक्रबार राष्ट्रसंघीय फोरमलाई सम्बोधन गरेपछि मन्त्री पुनले त्यहाँका उपमहासचिवसँग भेटवार्ता गरेका थिए ।

मन्त्री पुनले ‘एसडिजी सेभेन’को लक्ष्य महत्वपूर्ण भएको उल्लेख गर्दै त्यसलाई पूरा गर्न सरकारले कार्यक्रममै राखेर उच्च प्राथमिकताका साथ अघि बढाएको बताए ।

जवाफमा उपमहासचिव झेनमिनले नेपालको उर्जा र जलविद्युतको क्षेत्रमा निकै ठूलो सम्भावना रहेको भन्दै राष्ट्रसंघको आर्थिक, सामाजिक तथा विकास परिषद सहकार्य गर्न इच्छुक रहेको बताए ।

नेपालले उर्जा क्षेत्रमा गरेको प्रगतिको प्रशंसा गर्दै उपमहासचिव झेनमिनले राष्ट्रसंघ नेपाल सरकारसँग नजिक रहेर काम गर्न इच्छुक रहेको बताए ।