काठमाडौं– बहुमूल्य जडिबुटी यार्सा गुम्बा संकलनमा विद्यार्थीलाई रोक लगाइएको छ ।

विद्यालय तहमा अध्ययन गर्ने कुनै पनि व्यक्तिले यार्सा संकलन गर्न नपाइने गरी रोक लगाइएको हो । जुम्लाको पातारासी गाउँपालिकाले यार्सा संकलनका लागि विद्यार्थीहरुलाई रोक लगाएको हो ।

विद्यार्थीहरु वर्षेनी यार्सा टिप्न लेक जाँदा विद्यालयको पठनपाठन प्रभावित हुने गरेकाले यसपटक यार्सा टिप्न पाटन जान विद्यार्थीलाई रोक लगाइएको गाउँपालिकाका प्रमुख प्रशासकीय अधिकृत टेकबहादुर बुढ्थापाले जानकारी दिए ।

गाउँपालिकाले कुनै पनि विद्यार्थीलाई यार्सा टिप्ने काममा नलगाउन अभिभावकलाई सचेत गराएको छ । अधिकृत बुढ्थापाले यार्सा टिप्न विद्यार्थीलाई पाटन लैजाने चलनलाई निरुत्साहित गर्न अभियान नै थालेको पनि जानकारी दिए ।

बुढ्थापाका अनुसार विद्यार्थी यार्सा टिप्न जाँदा ३ महिनासम्म विद्यालय बन्द हुन्छन् । लामो समयसम्म विद्यालय बन्द हुँदा शैक्षिक अवस्थामा नै असर परेकाले गाउँपालिकाले यस्तो निर्णय लिएको हो ।