काठमाडौं –  पछिल्लो समययता नेपालमा रियालिटी शोको लोकप्रियता बढ्दो छ । केही हप्तादेखि कमेडी रियालिटी शो कमेडी च्याम्पियन प्रदर्शनमा आएको छ । च्याम्पियनमा हास्य क्षेत्रमा मौका खोजिरहेका कमेडियनले सहभागिता जनाएका छन् ।

शोको चर्चा बढ्दै छ । मनोज गजुरेल, सन्तोष पन्त, प्रदीप भट्टराई र ऋचा शर्मा निर्णायकको भूमिकामा छन् ।

इटहरीका सुमन कोइरालाको पनि चर्चा भइरहेको छ । ‘कमेडी च्याम्पियन’ को ‘टप–१५’ मा परेका सुमनको कमेडी शैलीलाई लिएर दर्शक उत्साहित भएका छन् । सुमन पनि कमेडी च्याम्पियनमा आफ्नो कला देखाउन पाउँदा खुशी व्यक्त गर्छन् ।

उनको प्रस्तुतिले निर्णायकलाई पनि खुशी तुल्याएको छ । उनको हास्य चेत र चोटिलो प्रहारलाई धेरैले रुचाएका छन् । निर्णायकले पनि सुमनले प्रस्तुत गर्ने विषयवस्तुलाई लिएर तारिफ गर्ने गर्छन् ।

एकै विषयवस्तुमा धेरै कुरा अटाउने उनको खुबीको तारिफ हुने गरेको छ ।

आयोजकले यो शो दर्शकले छोटो समयमा नै मन पराउँदै गएको बताएको छ । आफूलाई मन पर्ने प्रतिस्पर्धीलाई मोबाइलमा इसेवा एप डाउनलोड गरी भोट गर्न सकिनेछ ।

नेपालमा पहिलोपटक शुरु भएको यो खाले कमेडी शोले चर्चा पाइरहेको छ । शोलाई विशाल भण्डारीले निर्देशन गरेका छन् भने रीमा विश्वकर्माले कार्यक्रम सञ्चालन गरिरहेकी छिन् ।

कमेडी च्याम्पियन हुने विजेताले २५ लाख नगद र एउटा कार प्राप्त गर्ने आयोजकले जनाएको छ ।