काठमाडौं– फिफा विश्वकप २०२२ तथा एसियन कप २०२३ को संयुक्त छनोट खेल अन्तरगतको दोस्रो खेल नेपालले आज आफ्नो दोस्रो ‘अवे’ खेल चाइनिज ताइपेइसँग खेल्दैछ ।

ताइवानको ताइपेइ रंगशालामा हुने खेल नेपालीसमय अनुसार दिउँसो ४ बजेर ५५ मिनेटमा शुरु हुनेछ । विश्वकप छनोटको पहिलो खेलमा हार व्यहोरेको नेपाली टोलीका लागि खेलमा फर्किने अवसरका रुपमा ताइपेइसँगको खेललाई लिइएको छ ।

पहिलो खेलका कुवेतसँग ७–० गोल अन्तरले पराजित भएको नेपाल ताइपेइविरुद्ध अंक खोस्ने लक्ष्यमा रहेको छ । नेपाली राष्ट्रिय टोलीका मुय प्रशिक्षक योहान कालिनले पहिलो खेल गुमाए पनि दोस्रो खेलबाट लयमा फर्किने सम्भावना रहेको बताए ।

‘हामी पहिलो खेलमा पराजित भयौं। तर, हामी लयमा फर्किन चहान्छौं । हामी कहाँ चुक्यौं पत्ता लगाएका छौं,’ प्रशिक्षक कालिनले भने,‘हामी आफ्नो खेलमा फर्किने छौं जुन गल्ती कुवेतविरुद्ध भयो त्यो दोहोरिने छैन् ।’

प्रशिक्षक कालिनले ताइपेइ बलियो टोली रहेकाले यसलाई कमजोर भन्न नमिल्ने बताएका छन् । विपक्षी टोली ताइवानका प्रशिक्षकले आफ्नो टिमले शत प्रतिशत दिएर खेल्ने बताएका छन् । पहिलो खेलमा पराजित भएको ताइवानका लागि पनि नेपालसँगको खेलमा राम्रो खेल्नुको विकल्प नरहेको प्रशिक्षक लुइस लानकास्टरले बताए ।