साना– यमनमा सक्रिय हुथी लडाकु समूहले साउदी अरबको अबहा विमानस्थललाई लक्षित गरी चालकरहित विमान ड्रोनबाट आक्रमण गरेको दाबी गरेको छ ।

हुथी विद्रोही आबद्ध अल मशिरा टेलिभिजनले अबहा विमानस्थललाई लक्षित गरी आक्रमण गरिएको दाबी गरेको हो । अल मशिराले हुथी विद्रोहीका वरिष्ठ सैनिक श्रोतलाई उद्धृत गर्दै विमानस्थलको इन्धन डिपो र कन्ट्रोल टावरलाई लक्षित गरी आक्रमण गरेको जनाएको हो ।

आक्रमणबारे साउदी पक्षबाट भने कुनै टिप्पणी सार्वजनिक भइसकेको छैन । यद्यपि दुबईमा रहेका अल अरबिया टेलिभिजनले भने विमानस्थलको हवाई सेवा सामान्य रुपमा नै सञ्चालन भइरहेको जनाएको छ ।

हुथी विद्रोहीले साउदी अरबको अबहा विमानस्थललाई लक्षित गरी बेलाबेला ड्रोन आक्रमण गर्दै आएका छन् ।