एजेन्सी– शनिबार राति भएको स्पेनिस ला—लीगामा एट्लेटिको मड्रिडविरुद्ध गोल गरेका ग्यारेथ बेलले रियल मड्रिडमा आफ्नो १ सय गोल पुरा गरेका छन् । वान्डा मेट्रोपोलिटोन रंगशालामा भएको खेलमा घरेलु टोली एट्लेटिकोलाई रियलले ३—१ गोल अन्तरले पराजित गर्यो ।

रियलका लागि कासिमिरोले १६ औं मिनेटमा गोल गर्दै टिमलाई अग्रता दिलाएपनि खेलको २५ औं मिनेटमा एट्लेटिकोका एन्टोइनि ग्रिज्म्यानले गोल गर्दै रियलविरुद्ध बराबरी फर्काएका थिए ।

तर, कप्तान सर्जियो रामोशले खेलको ४६ औं मिनेटमा रियलले पाएको पेनाल्टीलाई गोलमा परिणत गरेपछि २—१ गोल अन्तरले अग्रता बनाएको थियो ।

त्यस्तै, खेलको ७४ औं मिनेटमा रियलका स्टार खेलाडी ग्यारेथ बेलले उत्कृष्ट गोल गर्दै रियलमा आफ्नो सय गोल पुरा गरेका छन् ।

जितसँगै लिगमा रियल दोस्रो स्थानमा फर्किएको छ । शीर्ष स्थानको बार्सिलोनाभन्दा ५ अंकले पछि रहेको रियलको ४५ अंक भएको छ भने पराजित एट्लेटिकोको ४४ अंकसहित तेस्रो स्थानमा रहेको छ ।