अमेरिका–अमेरिकाले २ खर्ब अमेरिकी बराबरका चिनियाँ सामानमा भन्सार शुल्क बढाउने घोषणा गरेको छ । अमेरिकी राष्ट्रपति डोनाल्ड ट्रम्पले एक घोषणा गर्दै २ खर्ब अमेरिकी डलर बराबरका सामानमा यसअघि १० प्रतिशत लाग्दै आएको भन्सार शुल्क बढाएर २५ प्रतिशत पु¥याइएको जनाएका हुन् ।

त्यसबाहेक अमेरिकाले ३ खर्ब २५ अर्ब अमेरिकी डलर बराबरका सामानमा थप कर बृद्धि गर्ने विषयमा पनि कागजी प्रक्रिया अघि बढाएको जनाएको छ । पछिल्लो समय अमेरिका र चीनबीच व्यापारिक विषयमा वार्ता भइरहेका बेला अमेरिकाले चीनमाथि दबाब दिनका लागि भन्सार शुल्क बढाएको अन्तर्राष्ट्रिय सञ्चारमाध्यमले जनाएका छन् । यता चीनले भने अमेरिकी घोषणालाई दुर्भाग्य रहेको जनाउँदै अमेरिकी घोषणाको आवश्यक जवाफ दिन चीन तयार रहेको जनाएको छ । चीनको वाणिज्य मन्त्रालयले अमेरिकी घोषणाको कस्तो जवाफ दिने भन्नेबारे भने केही खुलाएको छैन ।

पछिल्लो समय विश्वको सबैभन्दा ठूलो तथा दोश्रो ठूलो अर्थतन्त्रबीच जारी व्यापारिक मतभेद चुलिरहेका बेला अमेरिकाले चिनियाँ सामानमा भन्सार शुल्क बढाउने घोषणा गरेको हो ।