एल बि मगर

रोल्पा– रोल्पाको प्रवेशद्वार रुन्टिगढि गाउँपालिकाको होलेरी बजारको सार्वजनिक स्थानमा राखिएको डिजिटल बोर्ड विद्युतको बिल तिर्न नसक्दा एक महिना देखि सन्चालनमा आउन सकेको छैन ।

प्रदेश न . ५ को आन्तरिक कानुन तथा मामिला मन्त्रालयको बिपद् ब्यबस्थापन शाखाको आर्थिक सहयोग तथा जिल्ला प्रशासन कार्यालय रोल्पाको प्राबिधिक सहयोगमा केही महिना अगाडि होलेरी बजारको सार्वजनिक स्थान ट्राफिक चेक पोस्टको छेउमा राखिएको डिजिटल बोर्ड सञ्चालनमा नआएको हो ।

नागरिकलाई बिपद् सम्बन्धि जानकारी र विभिन्न चेतनामुलुक सूचनाहरुको जानकारी दिने उदेश्यले बोर्ड राखिएको जिल्ला प्रशासन कार्यालय रोल्पाले बताएको छ । कार्यालयका कम्प्युटर अप्रेटर हर्क बहादुर घर्तीले यस प्रकारका डिजिटल बोर्डहरु जिल्लाका सदरमुकाम सहित प्रमुख बजारहरुको पाँच स्थानमा राखिएको बताए ।

उनले भने, ‘बोर्ड रेखदेख र सन्चालनको जिम्मा सम्बन्धित स्थानीय प्रहरी प्रशासनलाई दिइएको थियो ।’

यता होलेरी स्थित ईलाका प्रहरी कार्यालयले बोर्ड सन्चालनका लागि मासिक रूपमा करिब दुई हजार रुपैयाँको विद्युत बिल आउने भएकाले बिल भुक्तानी गर्न आर्थिक समस्या भएको र सरोकारवाला निकाय कसैले सहयोगको चासो नदेखिएकाले बोर्ड सन्चालन हुन नसकेको बताएको छ ।

यता स्थानीयबासिहरुका भनाइ अनुसार गाउँपालिकाको केन्द्रको रहेको बजारमा रहेको चेतना मुलुक सूचना प्रबाह गर्ने एक मात्र डिजिटल बोर्ड मासिक दुई हजार रुपैयाको विद्युत बिल भुक्तानीको अभावमा बन्द हुनु गाउँमा रहेको स्थानीय सरकार बेखबर हुनु दु:खद पक्ष रहेको बताउँछन् ।
उनीहरुले सरोकारवाला निकायले चासो देखाइ छिट्टै सन्चालन हुनुपर्ने बताए ।

उक्त बजारको बाटो हुँदै दैनिक सयौं सार्वजनिक तथा निजि सवारी साधनहरु छिमेकी जिल्ला दाङ , प्युठान , रुकुम , रोल्पा लगायतका जिल्लामा आवतजावत गर्ने गर्दछ्न् ।