हलिउड हरर फिल्म ‘एनाबेल कम्स होम’ले संसारभर दर्शकको साथ पाएको छ । तर, फिल्म हेर्दा एक दर्शकले भने ज्यान गुमाउनुपरेको छ ।

थाइल्याण्डमा एक ७७ वर्षीय वृद्धले फिल्म थिएटरमा फिल्म हेर्दै गर्दा आफ्नो ज्यान गुमाएका हुन् । बर्नार्ड चैनिङ नाम गरेका व्यक्तिको मृत्यु भएको विदेशी मिडियाले जनाएका छन् ।

ब्रिटिशका नागरिक बर्नार्ड घुम्नका लागि थाइल्याण्ड पुगेका थिए । त्यहाँ रहँदा उनले फिल्म हेर्ने योजना बनाए । जुन फिल्म उनका लागि अन्तिम फिल्म बन्यो ।

फिल्म सकिएपछि जब थिएटरमा लाइट बालियो, त्यतिबेला सँगै भएकी महिलाले मृत्यु भइरहेको पाइन् ।

बर्नार्डलाई देखेर ती महिला जोडले चिच्याइन् । उनले आपतकालीन सेवामा फोन गरिन् । केही समयपछि अरु मान्छे पनि आए र एम्बुलेन्स बोलाए । तर, कसैले पनि फिल्म हेर्दा ती वृद्धको कतिबेला मृत्यु भयो भन्ने थाहा पाउन सकेनन् ।

स्थानीय प्रहरीका अनुसार अहिले ती महिलालाई नियन्त्रणमा लिइएको छ । यो बारेमा अझै केही खुलाइएको छैन । ती व्यक्तिमा केही रोग थियो कि, फिल्म हेरेकै कारण ज्यान गयो भन्नेमा अनुसन्धान भइरहेको जनाइएको छ ।