काठमाडौं– सिन्धुलीको कपिलाकोटा इलाका प्रहरी कार्यलयमा अभियुक्त पक्ष र प्रहरीबीच झडप भएको छ ।

प्रहरी र अभियुक्त पक्षको झडप नियन्त्रण गर्न प्रहरीले २० राउण्ड हवाइ फायर समेत गरेको छ ।

जिल्लाको मरिण गाउँपालिका–६ मा बिहीवार राति विवाहको भोजपछि झडप हुँदा नियन्त्रणमा लिइएको व्यक्तिको विषयमा स्थानीय र प्रहरीबीच झडप भएको हो ।

विवाहमा झडप गर्नेमध्ये स्थानीय गणेश कोलीलाई नियन्त्रणमा लिएपछि स्थानीयले इलाका प्रहरी कार्यालयमा ढुङ्गामुडा प्रहार गरेको जिल्ला प्रहरी कार्यालय सिन्धुलीका प्रमुख प्रहरी उपरीक्षक चक्रबहादुर सिंहले खबरहबलाई जानकारी दिए ।

एसपी सिंहका अनुसार स्थानीयले प्रहरी कार्यालयमा ढुङ्गामुडा गरेपछि स्थिति नियन्त्रणमा लिन प्रहरीले केही राउण्ड हवाइ फायर गरेको हो ।

स्थानीयले भने प्रहरीबाट जथाभावी गोली प्रहार भएको आरोप लगाएका छन् । स्थानीयका अनुसार प्रहरीले २० राउन्ड हवाइ फायर गरेको छ ।