रामेछाप– मोटर साइकल दुर्घटनामा परी रामेछापमा २ जनाको मृत्यु भएको छ । जिल्लाको मन्थली नगरपालिका–९ पुरानागाउँमा मोटरसाइकल दुर्घटना हुँदा २ जनाको  ज्यान गएको हो ।

बुधबार साँझ जिल्लाको पुरानागाउँअन्तर्गत अङ्गेरीपानीबाट खुरबेँसी जाने क्रममा बा ५१ प ६३६५ नम्बरको मोटरसाइकल दुर्घटना हुँदा खाँडादेवी गाउँपालिकाका २२ वर्षीय लोप्साङ लामा र ११ वर्षीय बालक चोककुमार श्रेष्ठको ज्यान गएको हो ।

मोटरसाइकल दुर्घटना हुँदा चालक लामाको घटनास्थलमै र ११ वर्षीय बालकको उपचारका लागि ल्याउने क्रममा बाटोमै निधन भएको जिल्ला प्रहरी कार्यालय रामेछापका प्रवक्ता शेख अदालतले जानकारी दिए ।

उनका अनुसार मोटरसाइकल सडकबाट १ सय मिटर तल खसेको थियो । पुरानागाउँको छापखानी खोला तरेर उकालो बाटोतर्फ जाँदै गरेको मोटरसाइकल अनियन्त्रित भई खोलामा खसेको जनाइएको छ । केही समयअघि पनि सोही ठाउँ नजिकै ट्र्याक्टर दुर्घटना हुँदा ७ जना घाइते भएका थिए ।