काठमाडौं– संस्थागत विद्यालयको संख्या बढ्दै गएसँगै काठमाडौं महानगरपालिकाले नयाँ विद्यालय सञ्चालन गर्न रोक लगाउने निर्णय गरेको छ ।
विद्यालय सञ्चालनको अनुमति, अपग्रेडजस्ता विषयमा स्वीकृति नै नलिई विद्यार्थी भर्ना गर्न विज्ञापन गर्ने परिपाटीको अन्त्य गर्नका लागि महानगरले यस्तो व्यवस्था गरेको दाबी गरेको छ ।

महानगरको शिक्षा विभागले विद्यार्थी भर्ना गर्नका लागि यस्तो प्रचारप्रसार नगर्ने समेत पटकपटक आग्रह गर्दै आइरहेको र सचेत गराउँदा समेत अटेर गर्नेलाई कानुनी कारवाहीका लागि प्रक्रिया अगाडि बढाउने विभागकी प्रमुख निर्मला केसीले खबरहबलाई जानकारी दिइन् ।

‘सञ्चालनमा रहेका विद्यालयलाई व्यवस्थापन गर्नका लागि नयाँ विद्यालय सञ्चालनमा रोक लगाइएका हौं’ केसीले भनिन्, ‘भएका विद्यालयलाई अपग्रेट गराउ विद्यालय नथपौं भन्ने हो’ ।

विभागका अनुसार हाल काठमाडौंमा ७ सय ३५ वटा विद्यालयहरु रहेका छन् । जसमध्ये ९३ वटा सामुदायिक विद्यालय रहेका छन् भने ६ सय ४२ वटा संस्थागत विद्यालय रहेका छन् ।