काठमाडौं- घरेलु टोली भारतले बंगलादेशविरुद्धको दोस्रो टी-ट्वान्टी क्रिकेटमा ८ विकेटको जीत निकालेको छ ।

राजकोटमा बिहिबार राति भएको खेलमा भारतले बंगलादेशलाई ८ विकेटले पराजित गरेको हो ।

बंगलादेशले दिएको १ सय ५४ रनको लक्ष्य भारतले १५ ओभर ४ बलमा मात्र २ विकेट गुमाएर पुरा गर्‍यो ।

भारतको जीतमा कप्तान रोहित शर्माले ८५ रनको अर्धशतकीय इनिङ्स खेले । उनले ४३ बलमा ६ चौका र ६ छक्का प्रहार गरे । यस्तै शिखर धवनले ३१ रन बनाए ।

श्रेयस आयर २४ रनमा अविजित रहदा लोकेश राहुल ८ रनमा अविजित रहे । बंगलादेशका इमुनुल इस्लामले २ विकेट लिए ।

यस अघि टस हारेर पहिले ब्याटिङ गरेको बंगलादेशले २० ओभरमा ६ विकेट गुमाएर १५३ रन बनाएको थियो ।

बंगलादेशको लागि मोहमद नाइमले ३६ रन बनाए । यस्तै कप्तान महमदउल्लाह र सौम्य सरकारले समान ३०/३० रन जोडे । लिटोण दास २९ रनमा आउट भए ।

भारतका युजभेन्द्र चाहलले २ विकेट लिए । जितसँगै भारतले तीन खेलको सिरिजमा १-१ को बराबरी गरेको छ । पहिलो टी-ट्वान्टीमा भने बंगलादेशले ७ विकेटको जित निकालेको थियो ।

अब अन्तिम तथा निर्णायक टी-ट्वान्टी आइतबार नागपुरमा हुनेछ ।