काठमाडौं– उर्जा, जलस्रोत तथा सिंचाईमन्त्री वर्षमान पुन र संयुक्त अरब इमिरेटस् (यूएई)का राजदूत सइद हम्दान अल नकीबीच भेटवार्ता भएको छ । भेटवार्तामा द्विपक्षीय र आपसी सम्बन्धका विषयमा छलफल भएको थियो ।

छलफलमा मन्त्री पुनले नेपालको उर्जा क्षेत्रमा लगानीको लागि उपयुक्त वातावरण बनेको भन्दै यूएईका लगानीकर्तालाई नेपालमा लगानी गर्न प्रेरित गरिदिन आग्रह गरे । उनले दुई देशबीचको सम्बन्ध परापूर्व कालदेखि नै घनिष्ट रहेको भन्दै आगामी दिनमा समेत सम्बन्ध अझै सुमधुर भएर अघि बढ्ने विश्वास व्यक्त गरे ।

भेटमा राजदूत सइदले उर्जा क्षेत्रमा नेपालसँग काम गर्न यूएई इच्छुक रहेको धारणा व्यक्त गरे । उनले यूएईले पनि तेल र ग्यासको सट्टा उर्जामा ध्यान केन्द्रित गर्न लागेको जानकारी दिँदै नेपालमा पनि लगानीको लागि आफूले पहल गर्ने प्रतिबद्धता व्यक्त गरे ।

२४ औं विश्व उर्जा सम्मेलनमा भाग लिन यूएई भ्रमणमा जान लागेका मन्त्री पुनलाई राजदूत सइदले आईतबार सिंहदरबारस्थित उर्जामन्त्रालयमै पुगेर कार्यक्रम बारे जानकारी गराएका थिए ।

उर्जामन्त्री यूएई भ्रमणमा जाने

उर्जामन्त्री वर्षमान पुन यूएईको तीन दिने भ्रमणमा जाने भएका छन् । यूएईमा आयोजना हुन लागेको २४ औं विश्व उर्जा सम्मेलनमा भाग लिन मन्त्री पुन आईतबार साँझ नेपाली प्रतिनिधिमण्डलको नेतृत्व गर्दै त्यसतर्फ प्रस्थान गर्ने कार्यक्रम छ ।

सम्मेलनमा ७० मुलुकका उर्जामन्त्रीका साथै विश्वभरबाट ५ सयभन्दा बढी कम्पनीका कार्यकारी अधिकृत र २ सय ५० जना वक्ताहरु सहभागी हुने छन् ।

१ सय ५० देशको सहभागिता रहने उक्त सम्मेलनमा तेल, ग्यास, जलविद्युत, पूर्वाधार, उर्जा उत्पादन, वैकल्पिक उर्जा, नविकरणिय उर्जा र ग्रिड प्रविधिको बिषयमा छलफल हुनेछ ।

मन्त्री पुनले सम्मेलनलाई सम्बोधन गर्ने कार्यक्रम पनि छ । उनी भदौ २६ मा स्वदेश फर्कने कार्यक्रम रहेको प्रमुख स्वकिय सचिव दुर्गा चापागाइँले बताए ।