बारा– बारा उद्योग वाणिज्य संघले अपरिचित व्यक्तिलाई एसिड विक्री वितरण नगर्न व्यवसायीलाई आग्रह गरेको छ ।

गत शुक्रवार वीरगञ्ज महानगरपलिकाको गणेशमानचोकमा १५ वर्षीया किशोरी मुस्कान खातुनमाथि एसिड प्रहार भएपछि बारा उद्योग वाणिज्य संघले अपरिचित व्यक्तिलाई एसिड विक्री वितरण नगर्न व्यवसायीलाई अपिल गर्दै विज्ञप्ति जारी गरेको छ ।

प्रेम प्रस्ताव अस्वीकार गरेको भन्दै विद्यालय जान लागेकी खातुनमाथि दुई किशोरले एसिड प्रहार गरेका थिए । एसिडका कारण खातुनको गाला, छाती र दाहिने हात जलेको थियो ।

खातुनको अहिले किर्तिपुर अस्पतालमा उपचार भइरहेको छ भने एसिड प्रहार गर्ने मध्येका एक जनालाई प्रहरीले नियन्त्रणमा लिएको छ । अर्का एक जना फरार रहेका छन् ।

विगत केही वर्षदेखि किशोरी र महिलामाथि एसिड आक्रमणको घटनामा वृद्धि भएको छ ।