काठमाडौं – नेत्रविक्रम चन्द(विप्लव) निकट नेकपाका एक कार्यकर्तालाई प्रहरीबाट छुटाउन ८० लाख विद्यार्थीलाई पढ्न पाउने अधिकारबाट वञ्चित गरिएको छ । पढ्न पाउने अधिकार हनन् हुँदा पनि सरकार निरीह देखिएको छ । राजनीतिक स्वार्थपूर्तिका लागि विद्यालय तथा कलेज बन्द गर्ने समूहलाई कारबाही गर्न नसक्दा यस्तो प्रवृत्ति मौलाइरहेको छ ।

बिहीबार पनि मुलुकभरका शैक्षिक संस्थामा पढाइ ठप्प भयो । विद्यार्थी घर फर्कन बाध्य भए । राजनीतिक रुपमा आफूलाई स्थापित गराउन विभिन्न बहाना बनाएर विद्यार्थी संगठनले आन्दोलन गर्ने गरेका छन् ।

नेकपानिकट अनेरास्ववियु (क्रान्तिकारी)ले कोषाध्यक्षसमेत रहेका नरेन्द्र विकलाई प्रहरीले पक्राउ गरेको विरोधमा शैक्षिक संस्था बन्द गरेको हो । समाचार अन्नपूर्ण पोस्ट्ले प्रकाशित गरेको छ ।