काठमाडौं– चेन्नेई सुपर किंग्सलाई ६ विकेटले हराउँदै मुम्बई इन्डियन्स इन्डियन प्रिमियर लिग आईपीएलको फाइनल प्रवेश गरेको छ । मंगलबार रातिको खेलमा चेन्नेईलाई पराजित गरेपछि मुम्बईले फाइलमा स्थान तयार पारेको हो ।

१ सय ३२ रनको लक्ष्य लिएर मैदान उत्रिएको मुम्बईले ९ बल बाँकी छँदै मात्र ४ विकेट गुमाएर लक्ष्य भेट्टाएको थियो । मुम्बईका लागि ओपनर रोहित शर्मा ४ र क्विनटन डी कक ८ रनमा पोविलियन फर्किए । तर, सुर्यकुमार यादवले मुम्बईको पारी सम्हाले ।

सुर्यकुमारले नटआउट ७१ रनको अर्धसतकीय पारी खेले । त्यस्तै इशान्त किसनले २८ रन बनाए । हार्दिक पाण्डेया शुन्य रनमा आउट भएका थिए । चेन्नेइका इमरान ताहिरले २ विकेट लिए ।

यसअघि टस जितेर पहिले ब्याटिङ गरेको चेन्नेईले निर्धारित २० ओभर खेल्दै ४ विकेट गुमाएर १ सय ३१ रनमात्र बनाएको थियो । चेन्नेईका लागि अम्बातु रायडुले ४२ रन जोडे । त्यस्तै कप्तान महेन्द्र सिंह धोनी ३७ रन जोडे । नटआउट रहेका रायडु र धोनीले ६६ रनको साझेदारी गरेका थिए ।

चेन्नेईका ओपनर फाफ डु प्लेसिस ६ रनमा आउट हुदाँ सेन वाटसन १० रनमा पोविलियन फर्किएका थिए । त्यस्तै सुरेश रैनाले ५ रन जोड्दा, मुरली विजयी २६ रनमा आउट भएक ।

मुम्बईका राहुल चाचरले २ तथा कुर्नाल पाण्डेया र जयन्त यादवले समान एक विकेट लिए ।

चेन्नेईले दोस्रो ईलिमिनेटर राउण्डमा दिल्ली क्यापिटल्स र सनराइजर्स हैदरावादको बिजेतासंग खेल्नेछ । पहिलो ईलिमिनेटर राउण्डमा आज (बुधबार) दिल्ली र हैदरावादबीच प्रतिस्पर्धा हुनेछ ।