काठमाडौं– शहीद स्मारक ‘सी’ डिभिजन लिगको आफ्नो पहिलो खेलमा मनोहरा युनाइटेड युथ क्ल्बले सुखद् सुरुआत गरेको छ ।
अखिल नेपाल फुटबल संघ (एन्फा) को सातदोबाटोस्थित एन्फा कम्प्लेक्समा भएको खेलमा समूह ए मा रहेको मनोहराले ओएसिस क्लबविरुद्ध ३—२ गोल अन्तरको जीत हात पार्‍यो ।

मनोहराविरुद्ध खेलको ६ मिनेटमा गोल गर्दै ओएसिसले सुरुआती अग्रता लिएको थियो । पहिलो हाफमा १—० गोल अन्तरले पछि परेको मनोहराविरुद्ध ५३ औं मिनेटमा ओएसीसका प्रकाश पुनले गोल गर्दै २—० को फराकिलो अन्तर बनाएको थियो ।

तर, मनोहराका लागि ८२ औं मिनेटमा दिनेश राईले गोल गर्दै टिमलाई लयमा फर्काए । त्यसको ठिक ७ मिनेटपछि ८९ औं मिनेटमा राईले व्यक्तिगत तथा टिमका लागि दोस्रो गोल गर्दै खेल २—२ को बराबरीमा पुर्‍याए ।

२—२ को बराबरी रहेको खेलको अतिरिक्त समयमा मनोहराका खेलाडीलाई ओएसीसका खेलाडीले फाउल गरेपछि मनोहराले पेनाल्टी पाएको थियो ।

उक्त पेनाल्टीलाई सिमोन राईले गोलमा परिणत गर्दै पहिलो खेल बराबरी हुनबाट जोगाए । जीतसँगै मनोहराले ३ अंक जोडेको छ ।