काठमाडौं – बहुप्रतीक्षित हलिउड फिल्म ‘क्याप्टेन मार्भल’ मार्च ८ अर्थात् आज शुक्रबारबाट नेपालमा समेत रिलिज हुने भनिएको थियो । फिल्म चल्ने भनेर महिनौँदेखि प्रचारप्रसार समेत गरिएको थियो ।

तर, अन्तिम समयमा आएर नेपालका फिल्म हलमा ‘क्याप्टेन मार्भल’ रिलिज नहुँदा फ्यानहरु दुःखी भएका छन् ।

सामाजिक सञ्जाल फेसबूक तथा ट्वीटरमा फ्यानहरुले समयमा फिल्म हेर्न नपाएको गुनासो गरेका छन् भने ट्वीटर तथा ब्लगको सहायता लिएर नेपालमा यो फिल्म रिलिज हुनुपर्ने माग राखेका छन् । नेपाली दर्शकमाझ मार्भल स्टुडियोका दुई फिल्म ‘क्याप्टेन मार्भल’ र ‘एभेन्जरः इन्ड गेम’ को निकै लामो समयदेखि प्रतीक्षा थियो ।

नेपालमा वितरणको जिम्मा लिएको गोपीकृष्ण मुभिजले भने यसबारेमा कुनै जानकारी दिएको छैन ।

नेपालका सिनेमा हलमा आज शुक्रबारदेखि चलचित्र ‘खाग’ र बलिउड फिल्म ‘बदला’ रिलिज गरिएको छ ।