काबुल– अफगानिस्तानको राजधानी काबुलमा बुधबार शक्तिशाली आत्मघाती बम विष्फोट हुँदा ९५ जना धेरै घाइते भएका छन् ।

काबुलमा रहेको प्रहरी चौकीलाई लक्षित गरी आत्मघाती कार बम विष्फोट गराइएको हो । शहरको पश्चिमी भागमा बिहानको व्यस्त समयमा बम विष्फोट भएपछि आकाशमा ठूलो धूवाँको मुस्लो देखिएको थियो ।

विष्फोटनमा घाइते हुनेमा महिला तथा बालबालिका गरी अधिकांश सर्वसाधारण रहेको अफगानिस्तानका सञ्चारमाध्यमले जनाएका छन् ।

आक्रमणको जिम्मा अफगानिस्तानमा सक्रिय इस्लामिक लडाकु समूह तालिबानले लिएको छ । तालिबानले काबुलको भर्ती केन्द्रलाई लक्षित गरी बम विष्फोट गराएको र ठूलो धनजनको क्षति भएको दाबी गरिएको छ ।

तालिबानले मंगलबारमात्र आगामी सेप्टेम्बरमा हुन लागेको निर्वाचनमा सहभागी नहुने र निर्वाचन अभियानलाई लक्षित गरी आक्रमण गर्ने चेतावनी दिएको थियो ।